اک دیا اور بجھا! شیخ الحدیث مولانا عبدالرشید ضیاء فی ذمۃ اللہ

جامعہ سلفیہ کے افق سے ایک اور ستارہ غروب ہوا

تحریر: عبدالقیوم فرُّخ

مولانا عبدالرشید ضیاء صاحب رحمہ اللہ تعالیٰ کا جامعہ سلفیہ میں عرصۂ تدریس بظاہر مختصر، یعنی تقریباً دو برسوں پر مشتمل تھا، لیکن اس قلیل مدت میں انہوں نے جس اخلاص اور ذمہ داری کے ساتھ خدمات سرانجام دیں، وہ قابلِ ستائش ہے۔
ادارے کی جانب سے انہیں جو بھی ذمہ داری سونپی گئی، انہوں نے خوش دلی اور شرحِ صدر کے ساتھ اسے قبول کیا۔ جو کتاب ان کے سپرد کی گئی، اسے انہوں نے مکمل احساسِ ذمہ داری کے ساتھ پڑھایا۔ طلبہ اور اساتذہ ان کی تدریسی صلاحیتوں سے مطمئن تھے۔ وہ نہایت سادہ مزاج، اپنے کام سے کام رکھنے والے، بے ضرر اور باوقار شخصیت تھے۔ گفتگو میں دو ٹوک، مختصر اور مقصد پر مبنی بات کرتے تھے۔ غیر ضروری طول، تکرار اور بے فائدہ گفتگو سے انہیں کوئی دلچسپی نہ تھی۔ یہی انداز ان کی تدریس اور خطبات میں بھی تھا؛ درس ہو یا خطبۂ جمعہ، ہر جگہ موضوع سے وابستگی اور اختصار ان کا خاص وصف تھا۔ ان کی شخصیت میں سنجیدگی کے ساتھ ساتھ ہلکا سا مزاح بھی شامل تھا، جو گفتگو کو خوشگوار بنا دیتا تھا۔
مولانا عبدالرشید ضیاء صاحب کا تعلق ضلع فیصل آباد کے علاقے جڑانوالہ (چک نمبر 24 گ ب) سے تھا۔ انہوں نے مختلف دینی مدارس سے تعلیم حاصل کی اور بعد ازاں متعدد معروف اداروں میں تدریسی خدمات انجام دیں، جن میں مرکز علوم اسلامیہ ستیانہ بنگلہ، جامعہ تعلیم الاسلام ماموں کانجن، اور 149 عارف والا کے ایک دینی ادارے کا نام نمایاں ہے۔ جب کہ تدریسی زندگی کے آخری ایام جامعہ سلفیہ میں بسر ہوئے۔ اس وقت ان کی رہائش فیصل آباد، سمندری روڈ، گلشنِ حرم میں تھی۔
اللہ تعالیٰ نے انہیں ہزاروں شاگردوں سے نوازا، جو آج نہ صرف پاکستان بلکہ بیرونِ ممالک بھی دین کی خدمت میں مصروف ہیں۔ ان کی نمایاں خصوصیات میں وسیع مطالعہ، علمی استحضار، مسائل پر گہری دسترس، اور دلائل کے ساتھ گفتگو کرنا شامل تھا۔ وہ کبھی بغیر دلیل کے بات نہیں کرتے تھے۔ وقت کی پابندی، نظم و ضبط اور طلبہ کے ساتھ حسنِ سلوک ان کی عملی زندگی کا روشن پہلو تھا۔
جامعہ سلفیہ میں آمد کے بعد وہ اکثر کہا کرتے تھے کہ ’’مجھے یہاں آنے میں دیر ہو گئی، مجھے پہلے ہی جامعہ سلفیہ آ جانا چاہیے تھا۔‘‘ جامعہ کا علمی ماحول، فضا، طلبہ و اساتذہ کا باہمی احترام، اور ادارے کے در و دیوار کی اپنائیت ان کی طبیعت کے عین مطابق تھی، اور وہ یہاں آ کر دلی طور پر خوش تھے۔
تقرری کے وقت جناب پرنسپل صاحب نے ان کے بارے میں معلومات حاصل کیں، اور اطمینان کے بعد انہیں فوری طور پر جامعہ سلفیہ میں خوش آمدید کہا گیا۔ پرنسپل صاحب نے فرمایا ایسے ہیرے کہاں ملتے ہیں! تدریس میں ان کی صلاحیت کا یہ عالم تھا کہ جہاں وہ پہلے پڑھاتے تھے، وہاں یہ بات مشہور تھی کہ کتاب ان کے سامنے رکھ دی جائے، طلبہ پڑھ پڑھ کر تھک جائیں گے مگر ضیا صاحب نہیں تھکیں گے۔ یہی وصف ہم نے بھی ان میں دیکھا۔ مشکل سے مشکل سبق کو نہایت سلیس، آسان اور واضح انداز میں بیان کرنا ان کا خاص کمال تھا۔
ان کی تحریر صاف، واضح اور خوش خط تھی، اور تقریر میں بھی اثر تھا۔ ہفتے میں ایک آدھ دفعہ وقفہ طعام کے دوران میرے کمرے میں تشریف لاتے، بعض اوقات پیغام بھیجتے کہ ’’آج ناشتہ آپ کے ساتھ کرنا ہے‘‘ اس مختصر وقت میں علمی گفتگو بھی ہوتی اور محبت بھرا وقت بھی گزرتا۔ میرے مختصر کتب خانے پر نظر پڑتی تو نئی کتابوں کے بارے میں پوچھتے، انہیں کھول کر دیکھتے، ورق گردانی کرتے، اور پھر تبصرہ فرماتے۔
جب بھی کسی مسئلے میں ان سے رہنمائی لی گئی، انہوں نے دو ٹوک، مدلل اور قرآن و سنت کی روشنی میں جواب دیا۔ جہاں کسی مسئلے میں مزید تحقیق کی ضرورت محسوس ہوتی، وہاں بلا تردد اس فن کے ماہرین سے رجوع کرتے اور کرواتے۔ ڈیڑھ ماہ پہلے ایک مسئلہ ان سے پوچھا گیا جس کا تعلق علمِ رجال اور جرح و تعدیل سے تھا، اس پر انہوں نے فرمایا: ’’یہ معاملہ لیبارٹری میں بھیجتے ہیں‘‘ یعنی اس فن کے متخصص علماء سے تحقیق کرواتے ہیں۔ اس ضمن میں انہوں نے متعدد اہلِ علم (جن میں شیخ الحدیث مولانا حافظ محمد شریف صاحب اور مولانا غلام مصطفی ظہیر امن پوری صاحب) سے رابطہ کیا اور تحقیق کے نتائج باقاعدہ ارسال کیے۔ یہ اور اس جیسی بے شمار خوبیاں ہیں جن کے گواہ ان کے رفقاء، شاگرد، احباب اور متعلقین ہیں۔
اللہ رب العزت سے دعا ہے کہ وہ مولانا عبدالرشید ضیاء صاحب رحمہ اللہ تعالیٰ کی تمام علمی و تدریسی کاوشوں کو شرفِ قبولیت عطا فرمائے، ان کے درجات بلند فرمائے، اور جامعہ میں ان کے خلاء کو کما حقہ پُر فرمائے۔