گھنی داڑھی کو وضوء میں دھونے کا کیا طریقہ ہے؟

سوال (2246)

اگر کسی شخص کی داڑھی اتنی گھنی ہو کہ نیچے کی کھال نظر نہ آتی ہو، مگر داڈھی ایک مشت سے کم ہو، تو وہ وضو کے دوران کھال تک پانی پہنچائے گا یا پھر داڑھی کا صرف ظاہری حصہ دھوئے گا؟

جواب

چہرہ دھونے کا حکم ہے، اگر چہرے پر بال زیادہ ہوں، جس کی وجہ سے کھال تک پانی نہ پہنچنے کا اندیشہ ہو، اس کا طریقہ یہ ہے کہ چہرے کو مسل کے دھونا چاہیے، جو داڑھی چہرے کے ساتھ ملی ہوئی ہے، اس کو چہرے کے ساتھ دھویا جائے گا، الگ سے نہیں دھویا جائے گا، بہرکیف چہرہ توجہ سے دھونا چاہیے، باقی جو لٹکی ہوئی داڑھی ہے، اس کے لیے ایک چلو لے کر خلال کرلیا جائے۔

فضیلۃ الشیخ عبد الوکیل ناصر حفظہ اللہ

داڑھی کا خلال کرے گا۔ واللہ اعلم
سیدنا انس بن مالک رضی اللہ عنہ فرماتے ہیں:

“أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ كَانَ إِذَا تَوَضَّأَ، أَخَذَ كَفًّا مِنْ مَاءٍ فَأَدْخَلَهُ تَحْتَ حَنَكِهِ فَخَلَّلَ بِهِ لِحْيَتَهُ»، وَقَالَ: «هَكَذَا أَمَرَنِي رَبِّي عَزَّ وَجَلَّ” [سنن أبی داود: 145]

رسول اللہ صلى اللہ علیہ وسلم جب وضوء فرماتے تو ایک ہتھیلی پانی کی لے کر اپنی تھوڑی کے نیچے داخل کرتے اور ا سکے ساتھ اپنی داڑھی کا خلال فرماتے۔ اور کہتے میرے رب عزوجل نے مجھے اسی طرح حکم دیا ہے۔

فضیلۃ الباحث ثناء الرحمن حفظہ اللہ

سائل:
محققین علمائے کرام سے اس روایت کی تحقیق مطلوب ہے۔
جواب:
اس میں ولید بن زوران لین الحدیث ہے، اس سلسلے کی دیگر روایات بھی کمزور ہیں، سوائے سیدنا عثمان کی روایت کے جس میں عامر بن شقیق ہے، تاہم امام بخاری رحمہ اللہ نے ترمذی کے بقول اس روایت کو احسن شیء فی الباب فرمایا ہے، البتہ اس میں چلو کا ذکر نہیں ہے۔

فضیلۃ العالم حافظ قمر حسن حفظہ اللہ

بارك الله فيكم
سیدنا انس رضی الله عنہ والی روایت ثابت ہے اور سیدنا عثمان رضی الله عنہ سے منسوب روایت علی الراجح ضعیف ہ، اس مسئلہ کی دیگر مرفوع روایات بھی ضعیف ہیں اور داڑھی کا خلال صحابہ، تابعین و سلف صالحین کے تعامل سے ثابت ہے۔
مصنف ابن أبي شيبة وغيره
ائمہ محدثین کا أحسن شيء، إسناد أحسن کہنے کا مطلب ہوتا ہے کہ یہ طریق و سند اس باب میں سب سے کم ضعف والا ہے، اس سے اصطلاحی معنی و حکم مراد نہیں ہوتا ہے۔
هذا ما عندي والله أعلم بالصواب

فضیلۃ العالم ابو انس طیبی حفظہ اللہ

جزاکم اللہ خیرا کثیرا شیخ، غالبا خلال کے لیے الگ سے چلو لینے کی روایت یہی ہے اور اس میں ضعف ہے، واللہ اعلم۔ اگر خلال کے لیے نیا پانی لینے کی کوئی صحیح حدیث ہو تو مشائخ راہنمائی فرمائیں

فضیلۃ العالم فہد انصاری حفظہ اللہ

داڑھی کا خلال علماء کے نزدیک مختلف فیہ ہے۔
امام شوکانی نے نیل الاوطار میں مفصّل بحث کی ہے جو کہ یہ ہے، حسن بن صالح ، ابو ثور اور ظاہریہ کے نزدیک خلال کرنا واجب ہے، وجوب کی دلیل امرنی ربی سے لی ہے، مالک، شافعی، ثوری اور اوزاعی کے ہاں داڑھی کا خلال واجب نہیں ہے، مالک اور کچھ اہل مدینہ کہتے ہیں کہ نہ وضو میں واجب ہے نہ ہی غسل میں، ابو حنیفہ، لیث، اسحاق، داؤد ظاہری، طبری وغیرھم کا موقف ہے کہ وضو میں خلال کرنا واجب نہیں اور غسل میں واجب ہے، جبکہ کچھ دیگر اہلِ علم کے ہاں خلال کرنا نہ واجب ہے نہ ہی سنت ہے، خلال کرنے کی جتنی بھی روایات ہیں ساری ہی ضعیف ہیں، چنانچہ ابنِ حجر نے احمد بن حنبل کا قول نقل کیا ہے کہ “لیس فی تخلیل اللحیة شیء”
اور اسی طرح ابن ابی حاتم نے اپنے والد سے روایت کیا ہے:
لا یثبت عن النبی صلی اللہ علیہ وسلم فی تخلیل اللحیة شیء.
دیکھیے ابنِ حجر کی تلخیص

فضیلۃ الباحث حنظلہ ربانی حفظہ اللہ

بہر کیف فقہاء کے نزدیک خلال وضو میں واجب نہیں ہے۔ داڑھی کے ظاہر کو دھویا جائے الا یہ کہ چہرہ نظر آئے، تب چہرے تک دھویا جائے۔

فضیلۃ العالم حافظ قمر حسن حفظہ اللہ

علامہ البانی نے “صحیح” کہا ہے۔ والسلام

فضیلۃ الباحث ثناء الرحمن حفظہ اللہ

آخری فیصلہ اس روایت کی قبولیت کا ہے۔ رد کا نہیں

فضیلۃ الشیخ عبد الوکیل ناصر حفظہ اللہ