سوال (544)
کیا قبرستان جوتوں سمیت قبرستان جانا یا جوتوں سمیت قبر کے اندر اتر کر میت کو لحد میں اتارنا اس بارے میں مکمل وضاحت فرما دیں ، کیا کسی حدیث میں ممانعت ہے ؟
جواب
مشروع و مستحب یہ ہے کہ قبرستان میں داخل ہوتے ہوئے جوتے اتار دینے چاہیں۔
سیدنا بشیر رضی اللہ عنہ فرماتے ہیں ۔
“بَيْنَمَا أَنَا أُمَاشِي رَسُولَ اللَّهِ صَلَّى اللَّهُ عَلَيْهِ وَسَلَّمَ، مَرَّ بِقُبُورِ الْمُشْرِكِينَ، فَقَالَ: لَقَدْ سَبَقَ هَؤُلَاءِ خَيْرًا كَثِيرًا، ثَلَاثًا، ثُمَّ مَرَّ بِقُبُورِ الْمُسْلِمِينَ، فَقَالَ: لَقَدْ أَدْرَكَ هَؤُلَاءِ خَيْرًا كَثِيرًا، وَحَانَتْ مِنْ رَسُولِ اللَّهِ صَلَّى اللَّهُ عَلَيْهِ وَسَلَّمَ نَظْرَةٌ، فَإِذَا رَجُلٌ يَمْشِي فِي الْقُبُورِ عَلَيْهِ نَعْلَانِ، فَقَالَ: يَا صَاحِبَ السِّبْتِيَّتَيْنِ، وَيْحَكَ، أَلْقِ سِبْتِيَّتَيْكَ، فَنَظَرَ الرَّجُلُ، فَلَمَّا عَرَفَ رَسُولَ اللَّهِ صَلَّى اللَّهُ عَلَيْهِ وَسَلَّمَ، خَلَعَهُمَا، فَرَمَى بِهِمَا” [سنن ابي داؤد : 3230]
«اسی اثناء میں کہ میں رسول اللہ صلی اللہ علیہ وسلم کے ساتھ جا رہا تھا کہ آپ کا گزر مشرکین کی قبروں پر سے ہوا، آپ صلی اللہ علیہ وسلم نے تین بار فرمایا: یہ لوگ خیر کثیر (دین اسلام) سے پہلے گزر (مر) گئے ، پھر آپ صلی اللہ علیہ وسلم مسلمانوں کی قبروں پر سے گزرے تو آپ نے فرمایا: ان لوگوں نے خیر کثیر (بہت زیادہ بھلائی) حاصل کی اچانک آپ صلی اللہ علیہ وسلم کی نظر ایک ایسے شخص پر پڑی جو جوتے پہنے قبروں کے درمیان چل رہا تھا آپ صلی اللہ علیہ وسلم نے فرمایا: اے جوتیوں والے! تجھ پر افسوس ہے، اپنی جوتیاں اتار دے اس آدمی نے (نظر اٹھا کر) دیکھا اور رسول اللہ صلی اللہ علیہ وسلم کو پہچانتے ہی انہیں اتار پھینکا»
شیخ ابن عثیمین رحمہ اللہ فرماتے ہیں کہ جوتے پہن کر قبرستان پہ چلنا خلاف سنت ہے ، افضل یہ ہے کہ جوتے اتار دے الا یہ کہ کوئی حاجت ہو تو کوئی حرج نہیں ہے ، جیسے قبرستان میں کانٹے ہوں ، یا وہاں چلنے میں تکلیف ہو تو اس صورت میں جوتے پہن سکتا ہے ۔
[مجموع فتاوى ابن عثيمين : 17/202]
باقی جن احادیث میں ممانعت ہے تاہم وہ کراہت پر محمول ہیں ۔
فضیلۃ العالم حافظ قمر حسن حفظہ اللہ
فضیلۃ الباحث افضل ظہیر جمالی حفظہ اللہ
