بیٹوں کی موجودگی میں پوتے کو وراثت ملے گی؟

سوال

ایک شخص کے تین کے بیٹے تھے اور چار بیٹیاں تھیں ۔ان میں سے ایک بیٹا اس کی زندگی میں فوت ہوگیا ۔اس فوت ہونے والے بیٹے کی اولاد موجود ہے ۔کیا اس طرح کے پوتے کو میراث ملے گی؟

جواب

الحمد لله وحده، والصلاة والسلام على من لا نبي بعده!

وراثت ملنے کی شرائط میں سے ایک شرط یہ بھی ہے، کہ وارث، موَرِّث کی وفات کے وقت زندہ ہو۔جو رشتے دار موَرِّث کی زندگی میں فوت ہو جاتے ہیں،ان کا وراثت میں کوئی حصہ نہیں ہوتا۔اس مرحوم کے تین بیٹے اور چار بیٹیاں تھیں۔ایک بیٹا زندگی میں فوت ہو گیا تو باقی دو بیٹے اور چار بیٹیاں ہیں۔اگر کوئی اور رشتہ دار نہیں ہے، تو اس جائیداد کے آٹھ حصے کرلئے جائیں۔دو دو حصے ہر بیٹے کو، اور ایک ایک حصہ ہر بیٹی کو مل جائے گا۔ مذکورہ پوتے وارث نہیں بن سکتے۔کیونکہ ان کا باپ ، ان کے دادا کی زندگی میں فوت ہوگیا ہے۔ اور چونکہ دادا کی اولاد موجود ہے، تو اولاد کی موجودگی میں پوتے ، پوتیوں کا حصہ نہیں ہوتا۔

امام بخاری رحمۃ اللہ علیہ نے کتاب الفرائض میں ایک عنوان قائم کیا ہے:

“باب میراث ابن الابن إذا لم یکن ابن”. [صحیح بخاری: ٦٧٣٥]

’پوتے کی وراثت اس وقت بنتی ہے جب بیٹے موجود نہ ہوں‘۔

اور پھر اس کے ساتھ زید بن ثابت رضی اللہ تعالی عنہ کا فتویٰ بھی نقل کیا ہے،کہ پوتا اس وقت وارث بنتا ہے جب مرحوم کا کوئی بیٹا نہ ہو۔

ہاں اگر دادے نے پوتوں کے لیےکچھ وصیت کی ہے ،تو یہ ان کا حق ہے، جو انہیں ملے گا۔ اسی طرح ان بچوں کے چچے اور پھوپھیاں حسنِ سلوک کرتے ہوئے، کچھ دینا چاہیں، تو دے سکتے ہیں۔