ربیع الاول میں سیرت کانفرنسوں اور خصوصی پروگراموں کی شرعی حیثیت

سوال 7495

السلام علیکم ورحمۃ اللہ وبرکاتہ
بارہ ربیع الاول کو خاص کر کے سیرت کانفرنس کرنا بھی بدعت ہے، بلکہ ایک باپ اپنے بچوں کو صرف اسی دن سیرت کی کتاب پڑھائے تو یہ بھی عید میلاد منانے میں شامل ہے۔
فضیلۃ الشیخ عبدالباسط فہیم حفظہ اللہ، فاضل مدینہ یونیورسٹی
میرے معزز علماء کرام! میں بندہ ناچیز کا ایک سوال ہے۔ میں ایک مسکین سا شخص ہوں، کوئی بے ادبی کروں تو معذرت خواہ ہوں۔
میرا سوال ہے کہ ربیع الاول کے مہینے میں خاص کانفرنس، سیرت کی نمائش یعنی Exhibition کروانا، سیرت کورسز کروانا، نعت کے مقابلے کروانا اور دیگر اعمال کرنا، خاص ربیع الاول کے مہینے میں، اس کی شرعی حیثیت کیا ہے؟
شیخنا عبد الباسط فہیم حفظہ اللہ کے نزدیک خاص اعمال ربیع الاول میں بدعت ہیں، اور یہی منہج میں نے اہل علم کا بھی پایا ہے، اور انہوں نے ربیع الاول میں کی جانے والی خاص عبادات کا رد بھی کیا ہے۔
مجھے جاننا ہے کہ ربیع الاول میں خاص اعمال سر انجام دینے کی شرعی حیثیت کیا ہے؟ کیا یہ بدعت نہیں؟ کیا بریلوی فرقے کے لوگ صحیح ہیں، کیونکہ وہ بھی تو یہی کام کرتے ہیں جو اب برصغیر کے اہل حدیث کے ہاں رائج ہونے لگ پڑے ہیں؟

جواب

وعلیکم السلام ورحمۃ اللہ وبرکاتہ
دیکھیں، آپ کا سوال خاصی تفصیل کا حامل ہے۔ ہر وہ کام جو ربیع الاول میں کیا جائے، محض اس وجہ سے بدعت نہیں بن جاتا کہ وہ ربیع الاول میں ہوا۔ اصل سوال یہ ہے کہ کیا اسے ربیع الاول کے ساتھ بطورِ خاص دینی فضیلت یا شعار کے طور پر، یا اسے موسمِ عبادت یا سنت سمجھ کر مخصوص کیا گیا ہے یا نہیں؟ اصل بات ہمارے سامنے یہ آنی چاہیے۔
دین میں کسی بھی عبادت یا نیکی کے لیے صرف اصل عمل کا ثابت ہونا کافی نہیں ہے، بلکہ اس کے سبب، نوعیت، طریقۂ کار، مقدار اور وقت کا بھی سنت سے ثابت ہونا ضروری ہے۔ اسی لیے ہمارے اسلاف رحمہم اللہ نے عبادت کے شرعی معیار میں وقت کی موافقت کو بھی بنیادی شرط قرار دیا ہے، جیسا کہ حج ہے، نماز ہے، روزہ ہے اور اسی طرح دیگر عبادات ہیں۔
لہٰذا عمومی طور پر سیرتِ رسول ﷺ پڑھنا اور پڑھانا عظیم نیکی ہے۔ نبی کریم ﷺ کی محبت، اتباع اور آپ ﷺ کی تعلیمات کو عام کرنا یقیناً بہت بڑی سعادت ہے۔ نعتِ رسول ﷺ بھی اگر شرعی حدود میں ہو تو اپنی اصل کے اعتبار سے جائز ہے۔ قرآنِ مجید اور حدیث کے مقابلے، علمی مسابقات اور سیرت کے مطالعاتی پروگرام اپنی اصل میں جائز و مفید ہیں۔
لیکن ان جائز اعمال کو یہ سمجھ کر ہر سال ربیع الاول کے ساتھ خاص کرنا کہ اس مہینے میں یہ اعمال بذاتِ خود زیادہ فضیلت رکھتے ہیں، یا ربیع الاول سیرت کے ایسے خصوصی اجتماعات کا شرعی موسم ہے، تو اس تخصیص کے لیے ہمیں دلیل درکار ہے۔
بعض اہلِ علم اسی مناسبت سے کہتے ہیں کہ سیرت کا بیان ہر وقت، یعنی پورا سال، باعثِ اجر ہے۔ اسے صرف ربیع الاول کے ساتھ خاص کرنا اہلِ بدعات کا چلن ہے، جس سے اجتناب کرنا چاہیے۔
اب آپ نے جو بات کی ہے کہ ربیع الاول میں خصوصی طور پر سیرت کانفرنسز کی جاتی ہیں، اگر یہ صرف انتظامی سہولت کے طور پر ہو کہ مثلاً ادارہ کہتا ہے کہ سال کے دوسرے پروگراموں کے ساتھ اس مہینے میں بھی ایک سیرت کانفرنس کر لیتے ہیں، اور اس کے لیے کوئی خاص شرعی فضیلت نہ سمجھی جائے، تو محض کانفرنس کا انعقاد بدعت نہیں کہلائے گا۔
لیکن اسے ہر سال ربیع الاول کا باقاعدہ دینی شعار بنا لیا جائے اور یہ تصور ہو کہ ربیع الاول میں سیرت کانفرنس کی خاص فضیلت ہے، تو یہ تخصیص محلِ نظر ہے۔
یا یہ سوچ ہو کہ اہلِ بدعات چونکہ گیارہ یا بارہ ربیع الاول کو بدعات کی ترویج کرتے ہیں، تو ان کو دعوت دینے کے لیے، ان کا مقابلہ کرنے کے لیے، انہیں کاؤنٹر کرنے کے لیے ہم بھی سیرت کانفرنس کریں جس میں دین کو بیان کریں، تو اس کے حوالے سے بھی بے شمار علماء کے ہاں تحفظات ہیں۔
سیرت Exhibition اگر نمائش کا مقصد سیرتِ نبوی ﷺ کی تعلیم، تاریخ، غزوات، اخلاق اور دعوت کو لوگوں تک پہنچانا ہو تو یہ ایک تعلیمی وسیلہ ہے۔ اسے ربیع الاول میں لگانے کو بذاتِ خود بدعت نہیں کہا جائے گا، لیکن ہر سال اگر یہ کام تقریب سمجھ کر لازم یا خصوصی ثواب کا کام قرار دیا جائے گا تو پھر وہی اشکال پیدا ہوگا۔
سیرت کے کورسز کے حوالے سے بھی یہی کہا جائے گا۔ اسی طرح نعت کے مقابلوں میں بھی یہی بات کی جائے گی۔
لیکن ہم یہاں پر ان تمام شکوک و شبہات سے بچنے کے لیے، اور اہلِ بدعات کے ساتھ مشابہت سے بچنے کے لیے یہ کہہ سکتے ہیں کہ سیرتِ طیبہ کے حوالے سے کسی بھی طرح کا پروگرام اسے ربیع الاول کے ساتھ خاص نہ کیا جائے، بلکہ سال کے دیگر دنوں کو آپ اپنے انتظامی طور پر فکس کر لیجیے۔ کوئی سا بھی دن رکھ لیجیے، اس میں کوئی مضائقہ یا کوئی ایشو نہیں ہے۔ بس یہ ہم کہہ سکتے ہیں تاکہ اس کی اہلِ بدعات کے ساتھ مشابہت نہ ہو۔
اب اس میں اور بھی بہت ساری باتیں کی جا سکتی ہیں، لیکن ہمارے بعض اہلِ علم یہ کہتے ہیں کہ ربیع الاول کو سیرتِ نبوی ﷺ کے پڑھنے، پڑھانے اور آپ ﷺ کی تعلیمات کو عام کرنے سے خالی نہ رکھا جائے، بلکہ سیرت کو پورے سال عام کیا جائے۔ ربیع الاول میں بھی اگر کسی تعلیمی یا دعوتی مصلحت سے سیرت کانفرنس، Exhibition یا کورس رکھا جائے تو اسے محض وقت کی وجہ سے بدعت نہ کہا جائے۔
البتہ کروانے والوں کے ذہن میں ایسی کوئی سوچ نہ ہو جس کی بنیاد پر ہم اسے بدعت کے زمرے میں داخل کریں۔
واللہ اعلم۔ باقی آپ مشائخ کی مزید آراء کا انتظار کر لیجیے۔

فضیلۃ الشیخ ڈاکٹر فیض الابرار شاہ حفظہ اللہ

سائل: شیخ حفظہ اللہ کا یہ بیان بھی ربیع الاول میں ہی منظر عام پر آیا ہے، بلکہ ہم سب کے ہاں یہ خاص موضوع ربیع الاول کے اندر ہی شروع ہوتا ہے۔
کیا یہ بھی بدعت شمار ہوگا؟
جواب: موقع کی مناسبت سے کوئی کام کرنا جائز ہے، اس کو واجب، حرام یا سنت و بدعت قرار دینا درست نہیں۔
انتظامی طور پر کوئی دن یا تاریخ مقرر کرنا بھی جائز و مباح ہے۔
جائز کو واجب یا سنت کہنے والے بھی غلط ہیں اور اسے حرام یا بدعت کہنے والے بھی غلط ہیں۔