عید کا خطبہ نماز سے پہلے ہے یا بعد میں

سوال

عید کا خطبہ نماز سے پہلے ہے یا بعد میں؟ اور خطبہ ایک ہے یا دو؟

جواب

الحمدلله وحده، والصلاة والسلام على من لا نبي بعده!

عیدین کا خطبہ نماز عید کے بعد ہے۔

حضرت جابر بن عبداللہ رضی اللہ تعالی عنہ بیان کرتے ہیں کہ میں عید کے دن رسول اللہ صلی اللہ علیہ وسلم کے ساتھ نماز عید کے لئے حاضر ہوا۔آپ نے پہلے نماز پڑھی پھر خطبہ دیا۔[مسلم:885]

عبداللہ بن عباس رضی اللہ تعالی عنہ بیان کرتے ہیں کہ میں رسول اللہ صلی اللہ علیہ وسلم، ابوبکرو عمر اور عثمان رضی اللہ تعالی عنہم کے ساتھ عیدین کی نماز میں حاضر ہوا ،یہ سب حضرات نماز عید خطبہ سے پہلے پڑھتے تھے۔[بخاری:962]

عیدین کا خطبہ ایک ہی ہے۔

تمام صحیح روایات کے مطابق عیدین کا خطبہ ایک ہی ہے۔ دو خطبوں والی جتنی بھی روایات ہیں وہ معیار صحت پر پوری نہیں اترتیں۔حافظ ثناء اللہ مدنی رحمہ اللہ لکھتے ہیں:

’اصلاً عید کے لیے خطبہ ایک ہے۔ دو خطبے کسی صحیح حدیث سے ثابت نہیں… اور جو لوگ دو خطبوں کے قائل ہیں، ان کا استدلال بعض ضعیف روایات سے ہے۔ اسی طرح وہ خطبۂ عید کو جمعہ کے خطبہ پر قیاس کرتے ہیں۔ بعض اہلِ علم نے اس مسلک کو اختیار کیا ہے۔ لیکن یہ مذہب مرجوح ہے۔راجح بات پہلی ہے۔کیونکہ ثانی الذکر کی دلیل کمزور ہے، اور اس پر قیاس کی بھی کوئی حیثیت نہیں۔ اس لیے کہ عبادات میں اصل ’’عدمِ قیاس‘‘ ہے‘۔ [فتاوی ثنائیہ مدنیہ: 1/840]