مسجد میں اعتکاف کی نیت کا حکم

سوال 7065

السلام علیکم و رحمۃ اللہ وبرکاتہ
حضرت ایک عالم صاحب اپنے بیان میں یہ کہہ رہے تھے کہ جب آپ مسجد میں نماز کے لیے داخل ہوں تو نماز کی تو اعتکاف کی نیت کر لیا کریں جب تک مسجد میں رہیں گے اعتکاف کا ثواب بھی ملتا رہے گا، کیا ایسا ہی ہے؟

جواب

وعلیکم السلام و رحمۃ اللہ وبرکاتہ!
دیکھیں، اگر کوئی ایسا کرنا چاہے تو بالکل کر سکتا ہے، لیکن یاد رہے کہ یہ کوئی لازمی کام نہیں ہے اور نہ ہی اس کے بارے میں کوئی حدیث موجود ہے۔ ہاں، ہمارے کچھ اسلاف (سلف صالحین) سے یہ بات ضرور ثابت ہے کہ جب وہ مسجد میں قدم رکھتے تھے تو اپنے دل میں ایسی نیت کر لیا کرتے تھے۔ اس کے لیے کوئی خاص الفاظ تو نہیں ہیں، بس دل کا ایک ارادہ ہی کافی ہے کہ یا اللہ! میں جتنی دیر یہاں ہوں، تیری رضا کے لیے خود کو مسجد کے لیے وقف کرتا ہوں۔
اعتکاف کا لغوی مطلب بھی یہی ہے کہ اللہ کی خاطر خود کو مسجد میں روک لینا۔ تو بس یہ کچھ بزرگوں کا اپنا معمول رہا ہے، اسے کوئی شرعی حکم، سنت یا حدیث نہ سمجھا جائے۔

فضیلۃ الشیخ عبد الوکیل ناصر حفظہ اللہ