سوال (2305)
ایک بندے نے خواب میں سیاہ رنگ کا سانپ دیکھا ہے، بیٹھا ہوا ہے، وہ شخص اس پے حملہ آور ہو تو اٹھ کے چلا گیا کوئی نقصان نہیں پہنچایا ہے۔
جواب
خواب میں سانپ کا دیکھنا عموماً دشمن کی طرف اشارہ ہوتا ہے، محسوس ہوتا ہے کہ کوئی حاسد اسے نقصان پہنچانا چاہتا ہے لیکن صاحب خواب محفوظ رہا ہے، لہٰذا ایسا خواب دیکھیں تو سنت کے مطابق برے خواب کی دعا پڑھیں:
“أَعُوْذُ بِاللّٰهِ مِنْ شَرِّهَا”
اور ایک روایت میں ہے کہ جب برا خواب دیکھتے ہوئے آنکھ کھلے، تو بائیں طرف کو تین مرتبہ تھتکاردے اور ’’أعوذ باللّٰہ من الشیطان الرجیم‘‘ تین مرتبہ پڑھے۔
ان شاء اللہ اللہ تعالی اس کے شر سے حفاظت فرمائیں گے۔
’’عن أبي سعید الخدري رضي اللّٰه عنه أنه سمع النبي صلی اللّٰه علیه وسلم یقول: إذا راٰی أحدکم الرؤیا یحبها، فإنما هي من اللّٰه، فلیحمد اللّٰه علیها، ولیحدِّثْ بما راٰی، وإذا راٰی غیر ذٰلک مما یکره فإنما هي من الشیطان، فلیستعذ من شرها ولا یذکرها لأحد؛ فإنها لا تضره”
[صحیح البخاري: ۶۹۸۵]
واللہ اعلم باالصواب
فضیلۃ العالم عبداللہ عزام حفظہ اللہ
سوال: ایک خاتون ہیں، جن کی شادی سگے تایا کے بیٹے سے ہوئی ہے۔ اور ان کو وہاں سے طلاق ہوئی ہے اور اب ان کی منگنی سگے پھپھو زاد کے ساتھ ہوئی ہے، ان کو ایک خواب ایک ہے، جس کی تعبیر درکار ہے وہ کہتی ہیں۔
خواب میں دیکھتی ہیں گھر میں کوئی فنکشن ہے اور سارے مہمان جمع ہیں، ان کھانا کھلا دینے کے بعد کچن میں خود اور دوسری کزنز کے ساتھ مل کے کھانا کھانے کے لیے بیٹھی ہے اور ساتھ ان کے بہن بھائی بھی موجود ہیں کچن میں ایک سانپ دیکھتی ہیں، جس کی لمبائی ایک ہتھیلی کے برابر ہے، سیاہ رنگ کا ہے اور سارے سانپ پر سفید نشانات موجود ہیں، وہ کہتی ہیں کہ میں اس سے ڈر رہی ہوں کہ یہ کسی کو نقصان نہ پہنچائے، اتنے میں ان کا چھوٹا بھائی اس کو ہاتھ میں پکڑتا ہے، کہتی ہیں میں نے اس کو منع کیا کہ چھوڑ دو کہیں تمہیں نقصان نہ پہنچائے، ان کے چھوٹے بھائی نے چھوڑا ہے تو وہ سانپ ان کے گھر کی دیوار سے دوسرے گھر چلا جاتا ہے جو کہ ان کے تایا کا گھر ہے (اور یہی ان کا سابقہ سسرال بھی ہے ) کہتی ہیں، خواب میں ہی میں نے چھوٹے بھائی سے کہا کہ ہماری ناراضگی اپنی جگہ لیکن ان کے گھر جاؤ اور ان کو جا کے بتا دو کہ سانپ آپ کے گھر میں آیا ہے، انہی باتوں میں شاید ان کا سابقہ جیٹھ اس سانپ کو پکڑ لیتا ہے یا موبائل چارجنگ سے اتارتے وقت سانپ اس کو خود ڈس لیتا ہے اور خاتون کو جاگ آجاتی ہے۔
براہ کرم اس خواب کی تعبیر بیان کر دیں۔
جواب: تسلی رکھیں آنے والی کسی آفت کا رخ موڑ دیا گیا ہے۔ ان شاءاللہ
فضیلۃ الباحث عبد الشکور محمدی حفظہ اللہ
